新手港媽: BB打針 #懶人包

一直覺得BB打針好混亂，究竟邊支針要係健康院打？邊支針要出去比錢打？

無論BB係公立定私家醫院出世，一出世果兩支針完全唔需要操心，醫院係會幫BB打。

出左世之後就開始要諗下，一個月果支乙型肝炎疫苗去唔去健康院打？

點解要諗？事關6-8週可以打6合1疫苗，仲可以口服埋輪狀病毒疫苗。

咩係6合1疫苗？簡單d講就係一個月果支乙型肝炎，再加兩個月果支4合1，仲有健康院無打既乙型流感嗜血桿菌疫苗。

如果跟足健康院既針，出去係打5合1，即係乙型肝炎同4合1，呢2針夾埋1針打，係無乙型流感嗜血桿菌。

而口服輪狀病毒疫苗有兩劑同三劑，睇下張圖就知道兩劑同三劑究竟有乜分別。

兩個月仲有支13價肺炎鏈球菌疫苗，比錢打6合1果陣可以比錢打埋，想慳番一千蚊既話要去轉健康院喇！

四個月同樣要打13價肺炎鏈球菌疫苗，去健康院打又慳番一千蚊，四個月仲要打4合1。

乙型流感嗜血桿菌合共要打3針，之前如果出去打左6合1，四個月係打5合1，或者齋打1支乙型流感嗜血桿菌。

兩個月果陣有口服輪狀病毒既話，記得四個月要再口服一劑。

而六個月健康院要打乙型肝炎同4合1，出去打可以2針夾埋1針打5合1，之前有打乙型流感嗜血桿菌就要打6合1。

無打針半年，一歲一打就要打三支，無乜必要出去打，去健康院打就可以喇！

坊間有疫苗計劃係九個月同一歲打ACWY型腦膜炎雙球菌結合疫苗，兒童甲型肝炎疫苗就一歲同一歲打，需唔需要打見仁見智。

到左一歲半，去健康院係打4合1同四痘混合疫苗 MMRV，如果之前有打乙型流感嗜血桿菌要出去打5合1，或者齋打1支乙型流感嗜血桿菌。

一歲半之後要到小一先再打針，小一打針已經唔需要去健康院，而係在小學打針。

未 LIKE 專頁記得 LIKE，有最新消息會 UPDATE！

* 資料只供參考，如有更改不另行通知，任何損失概不負責！

2020年2月22日星期六