診所驗孕

最值得一提嘅係診金，去診所驗孕同平時睇醫生嘅價錢係唔同，我係夜晚十點幾十一點走去新X醫療中心驗，盛惠$440，唔知係咪夜診先係呢個價錢，所以建議去診所驗之前要問清楚診金幾錢，一去診所就直接問姑娘呢度有無得驗孕，無須怕醜，但係確實有少少尷尬唔知尷尬啲乜。

姑娘講完診金登記完就比個樽仔我去廁所，去完之後比返個樽仔姑娘，我見姑娘唔係用驗孕棒驗，好似係用驗孕試紙驗，姑娘驗完係唔會話你知結果，坐低等嗌名見醫生，醫生親口證實我有左，估唔到我老公嘅反應係第一時間同我握手恭喜我，醫生就話係我恭喜你地就真，諗起都覺得好笑！😂

$440 其實就係為左兩封醫生信，一封係比公司嘅懷孕證明，另一封係比MCHC（母嬰健康院），醫生會根據最後一次來月經第一日計算預產期，兩封信都可以選擇寫或者唔寫預產期，我就兩封信都無寫預產期，只係寫最後一次來月經第一日嘅日期。

下一步應該做啲乜？照計我只係有左個幾月，真係唔知係咪需要即刻去睇婦科，不過上網睇啲人話去睇婦科照超聲波我個人覺得暫時無乜需要，所以下一步最應該就係去母嬰健康院約期。